Pasojat e ndryshimit të klimës: Arinjtë polarë mund të zhduken deri në vitin 2100

Arinjtë polarë mund të zhduken nga faqja e dheut deri në fund të shekullit, përveç nëse arrihet ndonjë përparim i rëndësishëm në luftën kundër ndryshimeve klimatike.

Shkencëtarët paralajmërojnë se disa popullata tashmë janë në prag të mbijetesës për shkak të shkrirjes së akullit të Arktikut. Përkatësisht, ariu polar ka nevojë për një shpërndarje të madhe të akullit të detit në Oqeanin Arktik për të gjuajtur me sukses fokat.

Për shkak se akulli po shkrihet dhe po copëtohet, arinjtë duhet të notojnë në distanca më të gjata ose të kërkojnë ushqim në breg. Kjo e vështirëson gjahun e tyre dhe shumë shpesh ata mezi arrijnë të ushqejnë veten dhe këlyshët e tyre.

“Ata janë zhvendosur tashmë në majën e botës”

“Ariu polar është bërë një ikonë në posterin e ndryshimeve klimatike,” tha Stephen Molnar nga Universiteti i Torontos.

“Ata tashmë janë zhvendosur në majën e botës. Nëse akulli zhduket edhe atje, ata nuk do të kenë ku të shkojnë tjetër,” tha ai.

Unioni Ndërkombëtar për Ruajtjen e Natyrës (IUCN) ka renditur arinjtë polarë si specie të rrezikuara sepse shumë studime të hershme kanë treguar që numri i tyre do të ulet ndjeshëm me shkrirjen e akullit të Arktikut.

Në një studim të kohëve të fundit, ekspertët duke përdorur modelimin e nevojave për energji të këtyre kafshëve unike arritën të përcaktojnë kornizën kohore në të cilën ato mund të zhduken.

Deri në vitin 2100, shumica e popullsive mund të zhduken

“Modelet kanë treguar që shkalla e mbijetesës së këlyshëve do të bjerë së pari, dhe se më vonë nënat nuk do të kenë yndyrë të mjaftueshme trupore për të prodhuar qumështin e nevojshëm për të ushqyer të rinjtë që mbijetojnë gjatë periudhës më të ngrohtë pa akull,” i tha zoologisti Steven Amstrup, shkencëtari kryesor në Polar Bears International BBC-së.

“Situata aktuale nuk është e mirë, por nëse fillojmë të sillemi me përgjegjësi si një shoqëri, atëherë ka akoma shpresë për të shpëtuar arinjtë polarë,” shtoi ai.

Hulumtimet kanë treguar që nën një skenar në të cilin mbeten emetimet e larta të gazrave serë, shumica e popullatave të ariut polar ka shumë të ngjarë të zhduken deri në vitin 2100. Edhe nëse arrijmë në ulje të moderuar të emetimeve, disa prej popullsive të tyre do të zhduken.

Këto gjetje përkojnë me parashikimet e mëparshme se nëse ndryshimi i klimës vazhdon deri në vitin 2100, vetëm disa popullsi të ariut polar do të mbeten shumë larg në veri.

Akulli i detit është ujë i detit i ngrirë që noton në sipërfaqen e oqeanit, duke u formuar dhe shkrirë me stinët polare. Disa formacione të akullit të detit mbeten në Arktik nga viti në vit, duke siguruar një habitat të rëndësishëm për jetën e egër si arinjtë polar, foka dhe lopë deti.

Akulli i detit, i cili në Arktik qëndron për më shumë se një vit është në rënie me një normë prej rreth 13% në dekadë që nga fillimi i imazheve satelitore në fund të viteve 1970.

Studim i quajtur Fasting season length sets temporal limits for global polar bear persistence është botuar dje në revistën Nature Climate Change./bbgreenkosova

Burimi: BBC, Nature Climate Change
Foto: Wikipedia