Gazetaria e Gjelbër: Si të raportohet për mjedisin, pyjet dhe ndryshimet klimatike
Prishtinë – Nesër, me qëllim të fuqizimit të kapaciteteve të medias në raportim për çështje mjedisore, organizohet trajnimi për gazetarë, “Si të Raportohet për Mjedisin, Pyjet dhe Ndryshimet Klimatike”.
Me urgjencën në rritje të ndryshimeve klimatike dhe krizave të tjera mjedisore, Gazetaria e gjelbër është bërë gjithnjë e më e rëndësishme globalisht. Në këtë aktivitet prezantohet manuali i parë në Kosovë për Gazetarinë e Gjelbër, një burim i rëndësishëm për mbulimin efektiv të çështjeve mjedisore.
“Manuali i Gazetarisë së Gjelbër”, i autorëve Behare Bajraktari pionere e gazetarisë së Gjelbër dhe Shahin Berisha, profesor shumë vjeçar në Arizona State University, nuk është një libër mbi shkencën e mjedisit, por një libër gazetarie mbi mjedisin.
Duke qenë se gazetaria mjedisore ka një rol kyç në rritjen e ndërgjegjësimit për politikat mbi natyrën, pyjet dhe ndryshimet klimatike, është themeluar edhe Shoqata e Gazetarëve të Gjelbër të Kosovës, një platformë bashkëpunimi për gazetarët e angazhuar në raportimin mjedisor.
Ky trajnim synon të pajisë gazetarët me teknika dhe njohuri për të raportuar mbi terminologjitë që përdoren në lëminë e mbrojtjes së ambientit, çështje kritike si shpyllëzimi, prerja ilegale e pyjeve dhe veprimet për ndryshimet klimatike.
Manuali për Gazetarinë e Gjelbër do të shërbejë si një mjet edukativ për gazetarët, studentët e gazetarisë, institucionet dhe grupet avokuese, duke theksuar rëndësinë e mbrojtjes së mjedisit dhe rolin e medies në informimin dhe nxitjen e veprimit. Rritja e ndërgjegjësimit dhe informimi i publikut është qëllim parësor për problemet mjedisore dhe pasojat e tyre.
Gazetaria e gjelbër, e cilësuar më saktë gazetaria mjedisore, është një fushë e specializuar raportimi që fokusohet në çështje që lidhen me botën natyrore dhe urbane si dhe ndikimin e aktiviteteve njerëzore në të. Në thelb, Gazetaria e gjelbër synon të informojë, edukojë dhe frymëzojë veprimin për mbrojtjen e mjedisit.
Në këtë ngjarje do të bashkohen për fjalë rasti;
- Z. Aivo Orav, Ambasador i BE-së në Kosovë
- Z. Jonas Westerlund, Ambasador i Suedisë në Kosovë
- Z. Naser Krasniqi, udhëheqës vendor i FAO-së
Trajnimi mbështetet nga programi “Mbështetje për fuqizimin e menaxhimit të qëndrueshëm dhe shumëqëllimor të pyjeve për të përmirësuar jetesën në vendet rurale dhe për të adresuar ndryshimin klimatik në Kosovë”, financuar nga Bashkimi Evropian dhe Suedia dhe zbatuar nga Organizata për Ushqim dhe Bujqësi e Kombeve të Bashkuara – FAO.
Ky trajnim, organizohet nga OJQ BB Green Kosova, mbahet më 20 mars 2025, në ora 09:00, në Hotel Sirius ( Salla Cassiopeia kati 2) , Prishtinë(Lokacioni në Google Maps).
Kur: 20 Mars, 2025
Ku: Hotel Sirius, Prishtinë
https://maps.app.goo.gl/Aj5Q6EKAosB6fc9D9
“Gazetaria e gjelbër formëson të ardhmen”
Ju faleminderit që do të bahkoheni me ne!