Fundi i tetorit, e deti Laptev ende pa akull

Për herë të parë që kur u mbajtën regjistrat, fidanishtja kryesore e akullit të detit Arktik në Siberi, Deti Laptev, ende nuk ka filluar të ngrijë në fund të tetorit, thanë shkencëtarët.

Ngrirja e vonuar vjetore në Detin Laptev u shkaktua nga temperatura e rritur për një kohë të gjatë në veri të Rusisë dhe përzierja e ujit nga ky det me ujë nga Atlantiku, shtuan shkencëtarët e klimës dhe paralajmëruan për efekte të mundshme negative në të gjithë rajonin polar.

Për më tepër është shqetësuese që temperatura e ujit në atë zonë këtë vit është më shumë se 5 gradë Celsius më e lartë se temperatura mesatare, e cila ndodhi pas një vale rekord të nxehtësisë dhe një rënieje jashtëzakonisht të hershme të akullit të detit dimrin e kaluar.

Grafikët që tregojnë ndryshimet në sipërfaqen e akullit të detit në Detin Laptev, të cilat zakonisht tregojnë një impuls të shëndetshëm sezonal (ulje gjatë verës dhe rritje në vjeshtë dhe dimër), kësaj radhe mbetën të sheshta. Nëse kjo tendencë vazhdon, mund të ketë pasoja serioze negative sepse Deti Laptev njihet si vendlindja e akullit që formohet përgjatë bregdetit atje në fillim të dimrit, dhe pastaj zbret në perëndim duke mbajtur lëndë ushqyese, para se të shkrihet në pranverë në ngushticën Fram midis Grenlandës dhe Svalbardit.

Nëse akulli formohet vonë, ai do të jetë më i hollë dhe për këtë arsye ka më shumë gjasa të shkrihet para se të arrijë në ngushticën e Framit. Kjo mund të nënkuptojë më pak lëndë ushqyese për planktonin në ujërat e Arktikut, gjë që do të shkaktonte më tej zvogëlim të aftësisë për të thithur dioksid karboni nga atmosfera.

Shkencëtarët shqetësohen gjithashtu se formimi i vonuar i akullit mund të përshpejtojë zvogëlimin e mbulesës së akullit dhe të çojë në një dobësim të efektit albedo. Nëse mbulesa e akullit do të ishte më e vogël, kjo do të nënkuptojë gjithashtu se ekziston një sipërfaqe më e vogël e bardhë që reflekton nxehtësinë e diellit përsëri në hapësirë, e cila do të kontribuonte në një rritje të temperaturës./bbgreenkosova

Burimi: The Guardian
Foto: RTL.hre