Ehinaceja, stimuluese e fuqishme e sistemit imunitar

Në natyrë rritet në Amerikën Veriore, ndërsa në Evropë është sjellë në shekullin XVIII

E quajtëm Ehinaceja, sipas emrit latin të gjinisë së saj, sepse ka disa lloje. Shqip gjetëm një emër për një lloj të saj – Rudbekia e kuqe dhe një tjetër Sheriboja, por nuk kemi njohuri për gjerësinë e përdorimit të këtyre emrave. Le të mbështetemi te emrin shkencor i saj, Echinacea.

Ehinaceja është gjini e familjeve barishtore shumëvjeçare nga familja e kompoziteve (Asteraceae). Rrënja është cilindrike, kërcelli vertikal dhe bosh. Gjethet e alternuara, të gjata e leshatuke. Lulet janë të trëndafilta apo të bardha, petalet me moshë lakohen kah ana e poshtme. Mund të rritet deri 1,20 m lartësi. Lulëzon nga prilli deri në shtator.

Në natyrë rritet në Amerikën Veriore, ndërsa në Evropë është sjellë në shekullin XVIII.

Se është shëruese e kanë ditur qysh indianët amerikanoveriorë, ndërsa sot kjo bimë përdoret anembanë botës. Ka varietete të ndryshme të bimës, të cilat përdoren si bimë dekorative.

• 

Kultivimi.– Kërkon vend me diell dhe truall të kulluar dhe të mirë. E duron thatësinë, është e pandjeshme në acar. Shumëzohet me rrënjë të prera në vjeshtë apo me fara në pranverë. Më së miri është të mbillet në mars e prill në hapësirë të mbyllur e astaj të rimbillet. Për të mbirë më shpejtë i nevojitet stratifikim, farën e përziejmë me zallë të lagësht, e vëmë në thes plastike dhe e mbyllim. Rëndom mbinë për 10-20 ditë në temperaturë deri 25 gradë Celsius.
Vitin e parë e zhvillon gëmushën, vitin e dytë fillon të lulëzojë. Në dimër e tërë pjesa mbitokësore e bimës vdes, ndërsa në pranverë nis me vegjetacion.

Përdorimi.– Ka efekt të fuqishëm stimulues në sistemin imunitar dhe është shumë e dobishme për forcimin e organizimit ndaj infeksioneve. Përdoret kundër të ftohurit dhe gripit, sidomos në mënyrë preventive në sezonin e gripit dhe të infeksioneve tjera.

Tinktura – 4 – 6 herë në ditë, gjatë një jave.

Burimi: Literatura profesionale
Foto: BB Green Kosova